Gruuëts op Venlo

Heerlik, ut veurjaorszunke schient wear door de takke van de baum op os veldje Ab Knieflap op camping Beringerzand. Ik kin dao zoe van genieten, die rust, ut fluite van de vögel en iddere aovend dea bbq lucht … ut vocht lup mich al in de mond as ik daor allein al aan dink… Effe ut verstand op nul, gin telefoon, gin oorlogsgeweld op de playstation of wat dan auk. Gewoen wear us tied hebbe veur un good book, zoeas  „Gruuets op Venlo” …. of gewoen effe niks motte.

Ik kiek oet de raam van os veurtent en zeet midden op het veld beej de zandbak Danique van Holten met eur gesponsorde rollatortje schravele. Ze heat net wear un viefdaagse chemokuur achter de rug en ik huur eur teage opa Ad zegge, OPA heb toch zoen pien aan de bein … Ut is echt verschrikkelik  det geit mich letterlik en figuurlik door merg en bein.

Zeej goeit eur kopdukske aaf en de zon glinstert op eur kale bölke. Ozze Ties zeat teage mich, pap waarom is hij kaal? Tja, daor staot ik dan met de mond vol tand. Ties is autistisch hea heat gin waardeoordeil, veur hum is det gewoen un constatering. Danique heat gin haor … dus bisse kaal. Wat gaon ik daor nou op zegge want ik weit al wat zien volgende vraog zal zien as ik zeg det zeej zeek is… Waarom is hij ziek? Jao waorum Ties, det vraog ik mich auch aaf? Waorum? Waorum is un meadje van 3 jaor zoe zeek? Waorum is der gin medicien wat der veur zurgt det Danique snel wear beater is. Ut antwoord op die vraog zulle weej wal noeits kriege. De vraog is in mien auge dan auk; geise dien leave loate leide door die vraog of geise der van make wat der van te make vilt.

Ik heuf daor neet lang oaver nao te dinke. As ik naor Danique zelf kiek dan zuuse ut van zelf. Haal toch oet ut leave wat der in zit …. De mos heur us zeen geneete daor in Beringe op de camping. Dea lach, det doorzettingsvermoge, dea ondeugd … Asse toch wets wat det kind allemaol mei heat gemak in heur jonge leaventje, dan schaam ik mich kapot as ik wear us laup te klage oaver un sneetje in miene vinger of wat dan auk. 

Ut is neet mekkelik veur pap en mam en de rest van de femilie: Al die minse die heur aankieke as zeej met heur kopdukske en heur slengske in de neus, in de campingtrein stapt. „Hup opa, rieje met dea trein”. Danique trekt zich der niks van aan en zeat teage de minse:”kiek, ik heb gin haor” Hoe lekker ongecompliceerd, gewoen recht veur de raap, ze kinne mich toch neet.

Maar dit jaor wuurd det anders, dit jaor kinne alle minse eur op de camping en de weide umgeaving, want weej kinne neet werkeloos aan de kant blieve staon te kieke en niks doon. Mier dan 4,5 doezend minse volge Kanjer Danique op facebook en de website welke acties der weare ingezatte um Danique te helpe. Auch Stephan Satijn en idderein betrokken beej ut book det vanaovend in ut middelpunt steit, wil daor zien steintje aan bijdrage. Echt hartverwarmend en hoapgeavend… Auch al bin ik gebore in Tegele, bin opgegreuid in Helden en woen in Arce: Ik kin neet anders concluderen dan ik bin: „Gruuets op Venlo”

Huub